Terminlər lüğəti

Həftəlik tam iş vaxtı İki istirahət günü olan beşgünlük iş həftəsi.

Həkim-onkoloq Onkologiya ixtisası üzrə hazırlıq keçmiş həkim-mütəxəssis.

Həkim-psixiatr Qanunvericilikdə müəyyən olunmuş qaydada psixiatriya fəaliyyəti ilə məşğul olan mütəxəssis.

Həkim–narkoloq Narkoloji xəstələrə ixtisaslaşdırılmış tibbi yardım göstərmək üçün müvafiq ixtisasa malik olan şəxs.

Həmkarlar ittifaqının ilk təşkilatı İstehsal və ya qeyri-istehsal sahələrində bilavasitə iş yeri üzrə çalışan işçilərin, habelə pensiyaçıların, təhsil alan şəxslərin birləşib təsis etdikləri həmkarlar ittifaqı təşkilatı.

Həmkarlar ittifaqları İşçilər arasında heç bir fərq qoyulmadan, işəgötürəndən qabaqcadan icazə alınmadan, sırf könüllülük prinsipləri əsasında müəssisədə yaradılan təşkilat. İşçilər əmək, sosial, iqtisadi hüquqlarını, qanuni mənafelərini müdafiə etmək üçün müvafiq həmkarlar ittifaqlarına daxil olub həmkarlar ittifaqlarının fəaliyyəti ilə məşğul ola bilərlər.

Həmkarlar ittifaqlarının ərazi birliyi Peşələr, sahələr üzrə həmkarlar ittifaqları birliklərinin respublika və yaxud müvafiq ərazi səviyyəsində birləşib təsis etdikləri həmkarlar ittifaqları birlikləri.

Hərbi soyğunçuluq Döyüş meydanında ölmüş və ya yaralanmış şəxslərin əmlakını talama.

Hərbi xidmət keçməkdən boyun qaçırma Qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma.

Hərəkət şiddəti Vahid vaxt ərzində yoldan və ya onun hər hansı bir hissəsindən hər iki istiqamətdə keçən avtomobil nəqliyyatı vasitələrinin sayı.