Terminlər lüğəti

Sığorta məbləğinin zərərliliyi Sığortaçının hesabat dövrü ərzində verdiyi sığorta ödənişləri məbləğinin hesabat dövrü ərzində qüvvədə olmuş sığorta müqavilələri üzrə ümumi sığorta məbləğinə nisbəti. Sığortanın növləri və/və ya/ sığorta fəaliyyəti üzrə təyin edilir.

Sığorta müqaviləsi Sığortalının müvafiq sığorta haqqı ödəməsi müqabilində sığorta obyektinin məruz qala biləcəyi risklərlə bağlı itkilərin, dəyən zərərin əvəzinin və ya razılaşdırılan pul məbləğinin müəyyən bir hadisənin baş verməsi əsasında ödənilməsinin sığortaçı tərəfindən öhdəlik kimi götürülməsi şərtlərinin təsbit edildiyi razılaşma

Sığorta nəzarəti orqanı Sığorta sektorunda dövlət tənzimləməsi və nəzarəti funksiyalarını həyata keçirən müvafiq icra hakimiyyəti orqanı

Sığorta obyekti Sığortalının, yaxud sığorta olunanın qanunazidd olmayan hər hansı əmlak mənafeyi

Sığorta ödənişi Sığorta hadisəsi baş verdikdə, qanunvericiliyə, həmçinin sığorta müqaviləsinə uyğun olaraq sığortaçı tərəfindən ödənilən maliyyə kompensasiyası

Sığorta olunan Sığorta müqaviləsi əsasında əmlak mənafeləri sığortalanan şəxs

Sığorta predmeti Sığorta müqaviləsi üzrə sığortalanan əmlak mənafelərinin aid olduğu fiziki şəxs, əmlak və ya hal

Sığorta qaydaları Sığorta qanunvericiliyinə uyğun olaraq, sığortaçının həyata keçirdiyi könüllü sığorta növünün əsaslandığı, sığortaçının özü tərəfindən və ya sığorta qanunvericiliyində nəzərdə tutulmuş digər qaydada hazırlanan, həmin sığorta növü üzrə qayda və şərtləri müəyyən edən sənəd

Sığorta riski Ehtimal olunan elə hadisədir ki, onun baş verməsinə qarşı sığorta aparılır. Sığorta riski sayılan hadisənin təsadüf əlamətləri olmalıdır.

Sığorta riski və ya risk Sığorta obyekti ilə bağlı itkilərin və ya zərərlərin yaranmasına səbəb olan hadisənin baş verməsi və ya halın yaranması ehtimalı, həmçinin bu ehtimala qarşı sığortaçının üzərinə götürdüyü öhdəlik