Dənizdə neft və qaz hasilatının ilk cığıraçanları olan Azərbaycan neftçiləri dünya neft sənayesinin inkişafına çox böyük töhfə vermişlər. XX əsrin əvvəllərində dəniz yataqlarının işlənməsi üçün Azərbaycan neftçilərinin yaratdıqları texniki baza onların bir çox nəsillərinin səyləri ilə daim təkmilləşdirilmişdir. Hələ iyirminci-otuzuncu illərdə ağac dirəklər üzərində qurulan, ilk dəfə Bibiheybət buxtası neft mədənində tətbiq edilən ada tipli qurğulardan Pirallahı adasına bitişik dəniz sahələrində tikilən nəhəng metal özüllərədək çox böyük bir yol keçilmişdir.

Açıq dənizdə yerləşən nadir Neft Daşları yatağının kəşf edilməsi dünya neftçıxarma sənayesinin inkişafında böyük hadisə olmuşdur. 1949-cu il noyabrın 7-də burada ilk neft fontanının vurması ilə dünya neft sənayesinin inkişafında yeni dövr başlanmışdır. Neft yataqlarının işlənməsi sahəsində dünya neft sənayesi tarixində misli görünməmiş proqram qısa müddətdə hazırlanmış və həyata keçirilmişdir. Burada çox mürəkkəb şəraitdə on kilometrlərlə uzanan estakada qurğuları və neft-mədən təsərrüfatı obyektləri tikilmiş, əlahiddə dəniz özüllərindən topa halında maili quyular qazılması metodu ilk dəfə tətbiq edilmiş, lay təzyiqinin saxlanması və dəniz şəraitində neftçıxarmanın intensivləşdirilməsi sistemi təşkil edilmiş, sualtı boru kəmərlərinin çəkilməsi, neftin və qazın sahilə nəql edilməsi məsələləri həll olunmuşdur.

Bu gün Neft Daşları Azərbaycan alimlərinin və mütəxəssislərinin mühəndis fikrinin, elmi və texniki mədəniyyətinin milli təcəssümüdür, açıq dənizdə müasir tipli yaşayış evlərinə, tibb müəssisələrinə və digər sosial obyektlərə malik bir şəhərdir. Burada hazırlanan ixtisaslı kadrlar Asiyanın, Avropanın və Amerikanın bir sıra ölkələrinin dəniz neft və qaz yataqlarının işlənməsində fəal iştirak etmiş, dünyanın bir çox dənizlərində geologiya və qazma işlərinin təşkilatçısı olmuşlar.

Azərbaycanın neft geoloqlarının inadlı axtarışları Xəzər dənizinin həm milli sektorunda, həm də bütün akvatoriyasında karbohidrogen ehtiyatlarının kəşf edilməsi, onun dünyanın ən böyük neftli-qazlı regionlarından biri kimi tanınması ilə nəticələnmişdir. Ötən illər ərzində Azərbaycan neftçiləri Xəzər dənizində 350-dən çox perspektivli struktur aşkara çıxarmış, 31 neft və qaz yatağı kəşf etmişlər. Xəzər dənizinin Azərbaycan sektorundan indiyədək 420 milyon ton neft və 320 milyard kubmetr qaz hasil edilmişdir.

Əlli il əvvəl bünövrəsi qoyulmuş bu mühüm tarixi hadisənin əhəmiyyəti bu gün, XX əsrin sonunda bu sahədə aparılan işlər zirvəsindən daha möhtəşəm görünür. 1994-cü il sentyabrın 20-də Azərbaycan Respublikasının Dövlət Neft Şirkəti ilə dünyanın tanınmış neft şirkətləri arasında Xəzər dənizinin Azərbaycan sektorunda yerləşən neft yataqlarının birgə işlənməsi barədə sazişin bağlanması bu regiona iqtisadi marağı daha da artırmış, qısa müddət ərzində dünyanın on iki ölkəsindən iyirmi neft şirkətini burada aparılan işlərə cəlb etmiş, Xəzər dənizinin digər sektorlarında da işlərin canlanmasına təkan vermişdir. Bu işlərin sürətləndirilməsi Xəzərin zəngin enerji ehtiyatlarından XXI əsrdə dünya iqtisadiyyatının inkişafı, ilk növbədə Xəzəryanı ölkələrin iqtisadi qüdrətinin möhkəmlənməsi naminə istifadə olunmasına geniş imkanlar yaradır.

Dünyada dənizdən neft və qaz çıxarmanın inkişafına Azərbaycan neftçilərinin misilsiz töhfə verdiklərini nəzərə alaraq, ölkənin dəniz neft sənayesinin 50 illik yubileyinin dövlət səviyyəsində bayram edilməsini təmin etmək məqsədi ilə qərara alıram:

1. 1999-cu ildə Azərbaycan dəniz neft sənayesinin 50 illiyinə həsr olunmuş yubiley tədbirləri keçirilsin.

2. Yubiley tədbirlərinin hazırlanması və keçirilməsi üçün aşağıdakı tərkibdə Təşkilat Komitəsi yaradılsın:

3. Təşkilat Komitəsinə tapşırılsın ki, yubileyin keçirilməsi ilə əlaqədar tədbirlər planı hazırlayıb təsdiq etsin.

4. Azərbaycan Respublikasının Nazirlər Kabineti və Azərbaycan Respublikasının Dövlət Neft Şirkəti bu Sərəncamdan irəli gələn məsələlərin həllini təmin etsinlər.