Bu Qaydalar Azərbaycan Respublikası Konstitusiyasının 37, 39-cu maddələrinə, «Yerli icra hakimiyyəti haqqında Əsasnamə»nin 32-ci maddəsinin 2-ci bəndinə, «İstehlakçıların hüquqlarının müdafiəsi haqqında» Azərbaycan Respublikası Qanununun 18-ci maddəsinin 1-ci bəndinə, 19-cu maddəsinin 1-ci yarımbəndinə uyğun olaraq hazırlanmışdır.

Qaydalar Azərbaycan Respublikası Ədliyyə Nazirliyində 21 yanvar 2000-ci il tarixdə qeydiyyata alınmış (Qeydiyyat № 210) «Bakı şəhərində ticarət, ictimai iaşə və xidmət obyektlərinin yerləşdirilməsi tələbləri» normativ aktına zidd olaraq fəaliyyət göstərən, Bakı Şəhər İcra Hakimiyyəti Başçısının ticarət, ictimai iaşə və xidmət obyektlərinin fəaliyyətini tənzimləyən sərəncamlarının tələblərini pozan, Azərbaycan Respublikası İnzibati Xətalar Məcəlləsi»nin 241-ci maddəsinə uyğun olaraq haqqında inzibati ölçü götürülən və obyektin həmin ünvanda fəaliyyətini müəyyən edilmiş tələblərə uyğunlaşdırmadan fəaliyyət göstərən obyektlərin həmin ünvanda fəaliyyətinin dayandırılması mexanizmini müəyyən edir.

Bu qaydalar aşağıdakı hallarda tətbiq edilir:

1.1. «Bakı şəhərində ticarət, ictimai iaşə və xidmət obyektlərinin yerləşdirilməsi tələbləri»nə uyğun yerləşdirilməyən və əhalinin istirahət, sağlamlıq hüquqlarının pozulması üçün zəmin yaradan ticarət, ictimai iaşə və xidmət obyektlərinə;

1.2. Azərbaycan Respublikası İnzibati Xətalar Məcəlləsinin 241-ci, 323-cü maddələrinə əsasən, haqqında bir il ərzində 2 dəfə inzibati ölçü götürülən və yenidən pozuntuya yol verən ticarət, ictimai iaşə və xidmət obyektlərinə;

1.3. 4 və 5 ulduzlu mehmanxanalarda fəaliyyət göstərən bar və diskotekalar istisna olmaqla, Bakı şəhərində yerləşən və gecə saat 24-00-dan sonra fəaliyyət göstərən bar, diskoteka və bu istiqamətdə fəaliyyət göstərən digər əyləncə-istirahət obyektlərinə;

1.4. «İstehlakçıların hüquqlarının müdafiəsi haqqında» Azərbaycan Respublikası Qanununa, Azərbaycan Respublikası İnzibati Xətalar Məcəlləsinə uyğun olaraq tətbiq edilən sanksiyaları və inzibati cərimələri müəyyən olunmuş müddətlərdə ödəmədən fəaliyyət göstərən obyektlərə.

2.1. Obyektin yerləşdirmə tələblərinə və istismar qaydalarına zidd olaraq fəaliyyət göstərməsi, həmçinin bu Qaydaların 1-ci bəndində göstərilən hallar barədə aktın rəsmiləşdirildiyi tarixdən sonrakı iş günündən gec olmayaraq obyektin fəaliyyətinin dayandırılacağı haqqında obyektdə işləyən məs`ul şəxsə və onun sahibinə 3 iş günü müddətində obyektdə olan malların çıxarılması da təklif olunmaqla bu qaydaya əlavə 1-də göstərilən forma üzrə xəbərdarlıq məktubu təqdim edilir. Xəbərdarlıq məktubu 3 (üç) nüsxədə tərtib edilməklə Bakı Şəhər İstehlak Bazarı və Xidmət Departamentinin (bundan sonrakı mətndə «Departament») ərazi idarəsinin rəisi (və ya onun müavini) tərəfindən imzalanır. Onun bir nüsxəsi obyektdə işləyən məs`ul işçiyə, ikinci nüsxəsi obyektin sahibinə təqdim edilir.

2.2. Xəbərdarlıq məktubunun təqdim edildiyi gündən sonrakı dördüncü iş günündə Departamentin ərazi idarə rəisi obyektin fəaliyyətinin dayandırılması haqqında bu qaydaya əlavə 2-də göstərilən forma üzrə 2 (iki) nüsxədən ibarət sərəncam verir. Sərəncamın bir nüsxəsi obyektdə işləyən məs`ul şəxsə təqdim edilir, ikinci nüsxəsi isə Departamentin ərazi idarəsində saxlanılır.

2.3. Obyektin fəaliyyətinin dayandırılması barədə sərəncamın icrası Departamentin ərazi idarəsinin nümayəndələri tərəfindən həyata keçirilir və bu barədə müvafiq akt tərtib edilir.

2.4. Sərəncamın verildiyi gündən sonrakı gün ərzində fəaliyyəti dayandırılan obyektə daxil olması mümkün olan bütün keçidlər müvafiq qaydada plomblanır (möhürlənir). Fəaliyyəti dayandırılmalı olan obyektin ümumi ticarət (xidmət və ya məişət) sahəsinin bir hissəsində yerləşdiyi və ayrıca keçidi olmadığı hallarda, bu obyektin fəaliyyətinin davam etdirilməsinin qarşısını alan tədbirlər görülür.

2.5. Əhali tərəfindən aydın görünən yerdə, obyektin fəaliyyətinin dayandırılması haqqında bu obyektin fəaliyyətinin dayandırılmasına səbəb olan pozuntunu özündə əks etdirən mə`lumat lövhəsi asılır.

2.6. Mallar və digər qiymətlilər obyektin məs`ul işçisi və ya sahibi tərəfindən obyektdən çıxarılmadığı halda, onların qorunmasına, keyfiyyət göstəricilərinin itirilməsinə görə Departamentin ərazi idarəsi məs`uliyyət daşımır.

Obyektin fəaliyyətinin dayandırıldığı günə qədər obyektin məs`ul işçisi və ya sahibi malları və digər qiymətliləri obyektdən çıxarmadığı halda, onun rəsmi müraciətinə əsasən, bunların obyektdən çıxarılması başqa tarixdə Departamentin ərazi idarəsinin nümayəndələrinin iştirakı ilə həyata keçirilə bilər.

2.7. Fəaliyyəti dayandırılmış obyektin sahibinin dəyişməsi və yaxud başqa şəxsə icarəyə verilməsi, onun fəaliyyətinin davam etdirilməsinə əsas vermir.

2.8. Obyektin fəaliyyətinin dayandırılması barədə sərəncamın icrasına Departamentin ərazi idarəsi tərəfindən müntəzəm nəzarət edilir.

3.1. Bu Qaydaların 1.1 bəndində göstərilən hal üzrə dayandırılmış fəaliyyət növü obyektin həmin ünvanda başqa fəaliyyət növünə keçildikdən sonra bərpa olunur.

3.2. Bu Qaydaların 1.2 və 1.4 bəndlərində göstərilən hallar üzrə dayandırılmış fəaliyyət, obyektin həmin ünvanda başqa fəaliyyət növünə keçildikdən və ya fəaliyyətin dayandırılmasına səbəb olan hallar aradan qaldırıldıqdan sonra bərpa olunur.

3.3. Bu Qaydaların 1.4 bəndində göstərilən hallar üzrə dayandırılmış fəaliyyət ona səbəb olan hallar aradan qaldırıldıqdan sonra bərpa olunur.

4.1. Fəaliyyəti dayandırılmış obyektin həmin ünvanda fəaliyyəti yalnız, fəaliyyətin dayandırılmasına səbəb olmuş hallar aradan qaldırıldıqdan, «Bakı şəhərində ticarət, ictimai iaşə və xidmət obyektlərinin yerləşdirilməsi tələbləri»nə uyğun olan digər fəaliyyət növünə keçildikdən sonra bərpa oluna bilər.

4.2. Fəaliyyəti dayandırılmış obyektin həmin ünvanda digər növlər üzrə fəaliyyət istiqamətləri haqqında obyekt sahibinin müraciəti Departamentin ərazi idarəsində müəyyən olunmuş qaydada baxılaraq yeni fəaliyyət növünə müvafiq razılıq verilir.

4.3. Fəaliyyətin dayandırılmasına səbəb olan halların aradan qaldırılması haqda müvafiq sənədlər təqdim edildikdən sonra, fəaliyyəti dayandırılmış obyektə müəyyən edilmiş qaydada müvafiq razılıq verildikdən sonra obyektin keçid yerlərinə vurulmuş plomblar Departamentin ərazi idarəsinin nümayəndələri tərəfindən götürülməklə obyektin fəaliyyəti bərpa olunur, bu barədə müvafiq akt tərtib olunur.

Obyektin fəaliyyətinə Departamentin ərazi idarəsi tərəfindən müntəzəm nəzarət olunur.

5.1. Obyektin fəaliyyətlərinin dayandırılması və ya bərpa edilməsi barədə tərtib edilən aktın (nümunəvi forma əlavə olunur) qeydiyyatı Departamentin ərazi idarəsi tərəfindən bu qaydaya əlavə 3-də göstərilmiş forma üzrə kitabda aparılır. Göstərilən kitabın vərəqləri nömrələnməli, qaytanlanmalı və son səhifəsində «Bu kitab ______ səhifədən ibarət olmaqla nömrələnmiş və qaytanlanmışdır» qeydi aparılmalı, Departamentin sədri tərəfindən imzalanmalı və möhürlə təsdiq edilməlidir.

5.2. Bu Qaydaların pozulmasına, obyektin fəaliyyəti dayandırılarkən vurulmuş plombların qəsdən zədələnməsi, qırılmasına görə obyektin məs`ul işçisi, onun sahibi mövcud qanunvericiliyə uyğun məs`uliyyət daşıyırlar.

5.3. Bu Qaydalar dövlət qeydiyyatına alındığı gündən qüvvəyə minir.