İqtisadiyyatın geniş miqyasda sərbəstləşdirilməsi Nazirlər Kabinetinin tərkibinə, onun aparatının və idarəetmənin digər mərkəzi və sahə orqanlarının strukturuna köklü şəkildə yenidən baxılmasını, onların funksiyalarının və vəzifələrinin dəqiqləşdirilməsini zəruri edir.

İdarəetmə strukturunun bazar iqtisadiyyatına keçid dövrünün tələblərinə uyğunlaşdırılması üçün qəti tədbirlərin həyata keçirilməsi məqsədilə Azərbaycan Respublikasının Nazirlər Kabineti qərara alır:

1. Azərbaycan Respublikasının Baş nazirinə tapşırılsın ki, Azərbaycan Respublikası Konstitusiyası ilə Nazirlər Kabinetinin müəyyən olunmuş status və səlahiyyətlərini əsas götürərək və bazar iqtisadiyyatına keçidin strateji istiqamətlərini və tələblərini nəzərə almaqla, 1996-cı il yanvarın 25-dək Azərbaycan Respublikası Nazirlər Kabinetinin tərkibi və aparatının strukturu haqqında təkliflərini Azərbaycan Respublikası Prezidentinə təqdim etsin.

2. Nazirliklərin, dövlət komitələrinin, şirkətlərinin, konsernlərinin və baş idarələrin rəhbərlərinə tapşırılsın ki, mövcud idarəetmə sisteminin kökündən dəyişdirilməsinə, onların say tərkibinə və strukturuna dair əsaslandırılmış təkliflərini, onların idarəetmə subyekti kimi fəaliyyətlərini təmin edən əsasnamələrinin layihələri ilə birlikdə bir həftə müddətinə Azərbaycan Respublikasının Nazirlər Kabinetinə təqdim etsinlər.

3. Azərbaycan Respublikası Nazirlər Kabineti təqdim olunmuş təkliflərin hərtərəfli təhlili əsasında və iqtisadiyyatın dövlət tərəfindən idarə edilməsinin dəqiq və çoxpilləliyin ləğvi, müxtəlif idarəetmə orqanlarının funksiyalarının və məsuliyyətinin dürüstləşdirilməsi, idarəetmə aparatının saxlanılması xərclərinin əhəmiyyətli dərəcədə azaldılması zərurətini nəzərə almaqla, sosial-iqtisadi sahələrin idarəetmə strukturunun layihəsini hazırlasın və 1996-cı il yanvarın 25-dək Azərbaycan Respublikası Prezidentinə təqdim etsin.

4. Yanacaq, energetika və maşınqayırma komplekslərinin rəhbərlərinə tapşırılsın ki, Azərbaycan Respublikasının Nazirlər Kabineti ilə birlikdə bu sahələrdə yaranmış vəziyyət, böhrandan çıxış yolları və bazar iqtisadiyyatı şəraitində onların fəaliyyət və inkişaf perspektivləri barədə məsələni 1996-cı il fevral ayının birinci yarısında Azərbaycan Respublikasının Prezidenti yanında müzakirə etmək üçün hazırlasınlar.