Azərbaycan Respublikasında avtomobil nəqliyyatı ilə beynəlxalq və şəhərlərarası sərnişin və yük daşınmasına, nəqliyyat-ekspeditor xidmətlərinə xüsusi razılıq (lisenziya) verilməsi qaydalarının təsdiq edilməsi haqqında
«Azərbaycan Respublikasının Qanunvericilik Toplusu»nda dərc edilmişdir (31 yanvar 1998-ci il, № 1 (7), maddə 45)
Relizin Tarixi: 12.01.1998
Azərbaycan Respublikasının Nazirlər Kabineti
Azərbaycan Respublikasında avtomobil
nəqliyyatı ilə
beynəlxalq və şəhərlərarası sərnişin və
yük daşınmasına, nəqliyyat-ekspeditor
xidmətlərinə
xüsusi razılıq (lisenziya) verilməsi
qaydalarının
təsdiq edilməsi haqqında
Qərar № 6
Bakı şəhəri, 12 yanvar 1998-ci il
«Xüsusi razılıq (lisenziya) tələb olunan fəaliyyət növlərinin siyahısının təsdiq edilməsi haqqında» Azərbaycan Respublikası Prezidentinin 1997-ci il 4 oktyabr tarixli 637 nömrəli Fərmanının icrası ilə əlaqədar Azərbaycan Respublikasının Nazirlər Kabineti qərara alır:
1. Azərbaycan Respublikasında avtomobil nəqliyyatı ilə beynəlxalq və şəhərlərarası sərnişin və yük daşınmasına, nəqliyyat-ekspeditor xidmətlərinə xüsusi razılıq (lisenziya) verilməsi Qaydaları» təsdiq edilsin (əlavə olunur).
2. Bu Qərar imzalandığı gündən qüvvəyə minir.
Azərbaycan Respublikasının Baş naziri
A.RASİ-ZADƏ
«Azərbaycan Respublikasının Qanunvericilik Toplusu»nda dərc edilmişdir (31 yanvar 1998-ci il, № 1 (7), maddə 45) («LegalActs» LLC).
7 noyabr 2002-ci il tarixli, 173 nömrəli Qərara əsasən qüvvədən düşmüşdür («LegalActs» LLC).
Azərbaycan
Respublikası
Nazirlər Kabinetinin
1998-ci il 12 yanvar tarixli
6 nömrəli qərarı ilə
təsdiq edilmişdir.
Azərbaycan
Respublikasında avtomobil nəqliyyatı ilə
beynəlxalq və şəhərlərarası sərnişin və
yük daşınmasına, nəqliyyat-ekspeditor
xidmətlərinə
xüsusi razılıq (lisenziya) verilməsi
Qaydaları
I. Ümumi müddəalar
1.1. Bu Qaydalar «Sahibkarlıq fəaliyyəti haqqında» Azərbaycan Respublikasının Qanununa, Azərbaycan Respublikası Prezidentinin 1997-ci il 27 yanvar tarixli 543 nömrəli Fərmanı ilə təsdiq edilmiş «Bəzi sahibkarlıq fəaliyyəti növlərinə xüsusi razılıq (lisenziya) verilməsi haqqında Əsasnamə»yə və «Xüsusi razılıq (lisenziya) tələb olunan fəaliyyət növlərinin siyahısının təsdiq edilməsi haqqında» 1997-ci il 4 oktyabr tarixli 637 nömrəli Fərmanına əsasən hazırlanmışdır və avtomobil nəqliyyatı ilə beynəlxalq və şəhərlərarası sərnişin və yük daşınmaları, nəqliyyat-ekspeditor xidmətləri fəaliyyəti ilə məşğul olmaq üçün xüsusi razılıq (lisenziya) verilməsi (bundan sonra lisenziya) qaydalarını müəyyən edir.
1.2. Bu Qaydalara əsasən «Azəravtonəqliyyat» Dövlət Konserni tərəfindən verilən lisenziya mülkiyyət və təşkilati-hüquqi formasından asılı olmayaraq hüquqi şəxslərə, habelə hüquqi şəxs yaratmadan sahibkarlıq fəaliyyəti ilə məşğul olan fiziki şəxslərə (bundan sonra «ərizəçilər») aşağıdakı fəaliyyət növlərini həyata keçirməyə icazə verən rəsmi sənəddir:
1.2.1. avtobusla, şəhərlararası (şəhərdaxili istisna olmaqla) sərnişin daşımaları;
1.2.2. şəhərlararası (rayonlararası) yük daşımaları;
1.2.3. avtobusla beynəlxalq sərnişin daşımaları;
1.2.4. beynəlxalq yük daşımaları;
1.2.5. nəqliyyat-ekspeditor xidməti.
Bu bənddə göstərilən hər bir fəaliyyət növü üçün ayrıca lisenziya verilir, ərizəçilərin fəaliyyəti çox profilli (yönümlü) olduqda onlar bir neçə lisenziyaya malik ola bilərlər.
1.3. Ərizəçilər yalnız bu Qaydalara əsasən lisenziya aldıqdan sonra həmin lisenziyada göstərilən sahibkarlıq fəaliyyəti növü ilə müəyyən edilmiş qaydada və müddətdə məşğul ola bilərlər.
1.4. Xarici hüquqi və fiziki şəxslər, xarici hüquqi şəxslərin filialları və nümayəndəlikləri öz ölkələrində bu Qaydalarda göstərilən fəaliyyət növü ilə məşğul olmaq üçün aldıqları lisenziyaların Azərbaycan Respublikasında tanınmasını müəyyən edən dövlətlərarası saziş olmadığı halda onlar həmin fəaliyyət növü ilə məşğul olmaq üçün bu Qaydalara uyğun olaraq lisenziya almalıdırlar.
1.5. Lisenziyanın sahibi verilən lisenziyadan (lisenziyanın surətindən, lisenziya kartından) yalnız özü istifadə edə bilər, onu başqa şəxslərə verə bilməz və bu lisenziyanın qüvvəsi lisenziya sahibinin təsisçisi olduğu hüquqi şəxslərə, lisenziyanın sahibi ilə birgə fəaliyyət, o cümlədən onunla əməkdaşlıq barədə bağlanmış müqavilə əsasında fəaliyyət göstərən başqa şəxslərə şamil edilmir.
Fərdi əmək müqaviləsi (kontraktı) və ya tapşırıq müqaviləsi əsasında lisenziya sahibinin adından hərəkətlər edən şəxsə müvəqqəti olaraq lisenziya kartının verilməsi lisenziyanın başqa şəxsə verilməsi sayılmır.
II. Lisenziyanın verilməsi qaydası
2.1. Lisenziya almaq üçün ərizəçi «Azəravtonəqliyyat» Dövlət Konserninə aşağıdakıları təqdim etməlidir:
2.1.1. Lisenziya almaq üçün ərizə.
Ərizədə aşağıdakılar öz əksini tapmalıdır:
- hüquqi şəxslər üçün — hüquqi şəxsin adı, təşkilati-hüquqi forması, hüquqi ünvanı, hesablaşma hesabının nömrəsi və bankın adı, fəaliyyət növü
2.1.2. müəssisənin təsis sənədlərinin surəti;
2.1.3. müəssisənin dövlət qeydiyyatı haqqında şəhadətnamənin surəti;
2.1.4. sahibkarlıq fəaliyyəti ilə məşğul olan fiziki şəxslərin vergi orqanları tərəfindən uçota alınması haqqında şəhadətnamənin surəti;
2.1.5. lisenziya almaq üçün dövlət rüsumunun ödənildiyini təsdiq edən sənəd;
2.1.6. ərizədə göstərilən obyektlərdən hər biri üçün ərizəçinin istifadə hüququnu (mülkiyyət hüququ, icarə, istifadə və s. əsasları) təsdiq edən sənədin surəti;
2.1.7. lisenziya verilməsi üçün tələb olunan zəruri şərait və şərtlər:
- avtonəqliyyat vasitələri haqqında tam məlumat verilməlidir;
- ərizəçinin əsas fəaliyyətinə köməkedici fondları haqqında, eyni zamanda onun nəqliyyat vasitələri üçün xüsusi dayanacaqların olması və ya başqa icazə verilən yerdə saxlanmasının mümkünlüyü haqqında məlumat verməlidir;
- ərizəçinin-hüquqi şəxsin mütəxəssislərinin tərkibi və ixtisası, o cümlədən yol hərəkəti təhlükəsizliyi üzrə mütəxəssisi haqqında məlumat verməlidir;
- sürücünün fasiləsiz iş stajı haqqında məlumat (üç ildən az olmayaraq), onun təhlükəli yük daşıyan avtonəqliyyat vasitələrinə icazə-buraxılış sənədlərinin, bu barədə xüsusi təlimat keçməsi haqqında şəhadətnamənin surətini təqdim etməlidir. Ərizəçinin (fiziki şəxs olduqda) və bu fəaliyyətin həyata keçirilməsinə cəlb ediləcək sürücülərin sürücülük vəsiqələrinin surəti.
2.1.8. Nəqliyyat-ekspeditor xidmətinə lisenziya verilərkən 2.1.1—2.1.6 yarımbəndlərində göstərilənlər tələb olunur.
2.2. Ərizəçidən bu Qaydalarda nəzərdə tutulmayan sənədlərin tələb olunması qadağandır.
2.3. Lisenziya almaq üçün təqdim olunan ərizə və bu Qaydalarda nəzərdə tutulan sənədlər «Azəravtonəqliyyat» Dövlət Konserni tərəfindən xüsusi kitabda qeydə alınmaqla qəbul edilir, baxılır, çatışmazlıqlar və ya imtina üçün əsas olmadıqda qeydə alındığı gündən başlayaraq 15 gündən gec olmamaqla lisenziya verilməsi haqqında qərar qəbul edilir.
Təqdim olunmuş sənədlərdə çatışmazlıqlar aşkar edildikdə, bu barədə ərizəçiyə yazılı məlumat verilir, onlar aradan qaldırıldıqdan və sənədlər təkrar təqdim edildikdən sonra onlara 5 gün müddətində baxılır və müvafiq qərar qəbul edilir.
Bu Qaydalarda göstərilən əsaslarla lisenziya verilməsindən imtina olunduğu halda bu barədə ərizəçiyə imtinanın əsasları göstərilməklə yazılı məlumat verilir.
Bu bənddə göstərilən müddətlərin son günü qeyri iş gününə düşərsə, ondan sonrakı iş günü müddətin qurtarma günü hesab olunur.
2.4. Lisenziya verilməsindən aşağıdakı hallarda imtina edilir:
2.4.1. bu Qaydalarda nəzərdə tutulmuş sənədlər təqdim edilmədikdə;
2.4.2. ərizəçinin təqdim etdiyi sənədlərdə qeyri-dürüst və ya təhrif olunmuş məlumatlar olduqda;
2.4.3. fəaliyyət növünün həyata keçirilməsi üçün ərizəçinin bu Qaydalarda nəzərdə tutulan zəruri şərait və şərtləri təmin etmədikdə;
2.4.4. ərizəçi və ya cəlb ediləcək mütəxəssislər bu Qaydalarda nəzərdə tutulan fəaliyyətlə məşğul olmaq üçün müvafiq ixtisasa malik olmadıqda;
2.4.5. ərizəçinin əvvəllər bu fəaliyyət növü üçün aldığı lisenziyanın lisenziya verən orqanın təşəbbüsü ilə ləğv edilməsindən 2 il vaxt keçməmişdirsə;
2.4.6. ərizəçi, əvvəllər bu fəaliyyət növü üçün aldığı lisenziyanın fəaliyyəti lisenziya verən orqanın təşəbbüsü ilə dayandırıldığı dövrdə müraciət etdikdə;
2.4.7. qanunvericilikdə nəzərdə tutulan digər hallarda.
2.5. Ərizəçi lisenziya verilməsindən imtinaya əsas olmuş halları aradan qaldırdıqdan sonra lisenziya almaq üçün bu Qaydalara uyğun olaraq «Azəravtonəqliyyat» Dövlət Konserninə müraciət etmək və ya imtina barədə qərarla razılaşmadıqda məhkəməyə müraciət etmək hüququna malikdir.
2.6. Müəssisə, təşkilat, idarə ləğv edildikdə, yaxud sahibkar kimi fəaliyyət göstərmək üçün fiziki şəxsə verilən şəhadətnamə qüvvədən düşdükdə, hüquqi və fiziki şəxslərə verilən lisenziya da öz hüquqi qüvvəsini itirir.
Hüquqi şəxs yenidən təşkil edildikdə, onun adı dəyişdirildikdə, fiziki şəxsin şəxsiyyətini təsdiq edən sənəd haqqında məlumatları dəyişdikdə, lisenziya itirildikdə ərizəçi 15 gün müddətində lisenziyanın yenidən rəsmiləşdirilməsi üçün ərizə təqdim etməlidir.
Lisenziyanın yenidən rəsmiləşdirilməsi onun verilməsi üçün müəyyən edilmiş qaydada həyata keçirilir.
Lisenziyanın yenidən rəsmiləşdirildiyi müddətdə lisenziyanın sahibi öz fəaliyyətini əvvəlki lisenziya (ayrı-ayrı obyektlər üçün verilmiş lisenziyanın surətləri, lisenziya kartları) əsasında, lisenziya itirildikdə isə «Azəravtonəqliyyat» Dövlət Konserni verdiyi müvəqqəti icazə (ayrı-ayrı obyektlər üçün verilmiş lisenziyanın surətləri və ya lisenziya kartları) əsasında həyata keçirir. «Azəravtonəqliyyat» Dövlət Konserninin rəhbəri tərəfindən imzalanmış və möhürlə təsdiq edilmiş müvəqqəti icazə lisenziyanın yenidən rəsmiləşdirilməsi üçün bütün sənədlər təqdim edildikdə verilir.
III. Lisenziya
3.1. Lisenziyada aşağıdakılar göstərilir:
3.1.1. lisenziya verən orqanın adı;
3.1.2. hüquqi şəxslər üçün — lisenziya verilən müəssisə, təşkilat və idarənin adı və hüquqi ünvanı;
3.1.3. fiziki şəxslər üçün — adı, atasının adı, soyadı, şəxsiyyəti təsdiq edən sənəd haqqında məlumatlar (seriya, nömrə, kim tərəfindən və nə vaxt verilmişdir, yaşayış yeri);
3.1.4. həyata keçirilməsinə lisenziya verilən fəaliyyət növü;
3.1.5. lisenziyanın qüvvədə olma müddəti;
3.1.6. müvafiq fəaliyyət növünün həyata keçirilməsi qaydası (beynəlxalq və şəhərlərarası avtobusla sərnişin daşımalarında konkret marşrut, avtonəqliyyat vasitələrinin tərkibi və s.);
3.1.7. lisenziyanın qeydiyyat nömrəsi və verilmə tarixi.
3.2. Lisenziya «Azəravtonəqliyyat» Dövlət Konserninin rəhbəri (o olmadıqda, rəhbəri əvəz edən) tərəfindən imzalanır və Konsernin möhürü ilə təsdiq olunur.
IV. Lisenziyanın müddəti
4.1. Lisenziya 2 il müddətinə verilir.
Lisenziya alan şəxsin ərizəsinə əsasən lisenziya 2 il müddətinədək verilə bilər.
4.2. Lisenziyanın qüvvədə olma müddətinin uzadılması onun verilməsi üçün müəyyən olunmuş qaydada həyata keçirilir.
4.3. Müddəti bitmiş lisenziya, onun surətləri və ona verilmiş lisenziya kartları etibarsız sayılır.
V. Lisenziyanın surəti və lisenziya kartları
5.1. Lisenziyalaşdırılan fəaliyyət növü ərazi baxımından ayrı-ayrı obyektlərdə həyata keçirildiyi halda, ərizəçiyə lisenziya ilə birlikdə ərizədə göstərilən hər bir obyekt üçün onun ünvanı göstərilməklə lisenziyanın surəti təqdim olunur.
5.2. Ərizəçi lisenziya aldıqdan sonra öz fəaliyyətini ərazi baxımından ayrı-ayrı obyektlərdə həyata keçirmək və ya belə obyektlərin sayını artırmaq istədikdə təzə obyektlərə lisenziyanın surətlərini almaq üçün «Azəravtonəqliyyat» Dövlət Konserninə aşağıdakı sənədləri təqdim etməlidir:
5.2.1. verilmiş lisenziyanın qeydiyyat nömrəsi, tarixi, fəaliyyət növü, təzə obyektlərin sayı və ünvanı göstərilməklə ərizə;
5.2.2. obyektlər barədə bu Qaydaların 2.1.6—2.1.7 yarımbəndlərində tələb olunan sənədlər.
5.3. «Azəravtonəqliyyat» Dövlət Konserni lisenziyanın surətlərinin verilməsi məsələsinə dair müraciətə bu Qaydaların 2.3 və 2.4 bəndlərinə əsasən baxır və müvafiq qərar qəbul edir.
5.4. Lisenziyanın surəti — lisenziyanın sahibinə hər bir obyekt üçün lisenziya blankında, verilmiş lisenziyada əks edilən göstəricilər yazılmaqla, blankın yuxarı sağ küncünə «Surəti» sözü və ünvan qrafasına obyektin ünvanı da əlavə edilməklə doldurulmuş «Azəravtonəqliyyat» Dövlət Konserninin rəhbəri tərəfindən imzalanan və «Azəravtonəqliyyat» Dövlət Konserninin möhürü ilə təsdiq edilən və həmin obyektə bu fəaliyyət növü ilə məşğul olmağa icazə verən rəsmi sənəddir.
5.5. Lisenziyaların surəti «Azəravtonəqliyyat» Dövlət Konserni tərəfindən qeydə alınır.
5.6. Lisenziyanın surəti itirildikdə lisenziya sahibi lisenziyanın yeni surətini rəsmiləşdirmək üçün «Azəravtonəqliyyat» Dövlət Konserninə müraciət edir.
5.7. Lisenziyanın surətinin verilməsi və yenidən rəsmiləşdirilməsi üçün haqq alınmır.
5.8. Ərizəçi hər bir avtonəqliyyat vəsitəsinə verilən lisenziyaya uyğun, forması «Azəravtonəqliyyat» Dövlət Konserni tərəfindən tərtib və təsdiq edilmiş lisenziya kartları verilir.
5.9. «Azəravtonəqliyyat» Dövlət Konserni tərəfindən verilən lisenziya kartlarında aşağıdakılar göstərilməlidir:
5.9.1. lisenziyanın qeydiyyat nömrəsi, tarixi və etibarlılıq müddəti;
5.9.2. avtomobilin markası, növü və dövlət qeydiyyat nişanı;
5.9.3. lisenziyanın sahibinin adı;
5.9.4. fəaliyyət növü (avtobusla sərnişin daşınmasında konkret marşrut göstərməklə);
5.10. Avtonəqliyyat vasitələrinə verilən lisenziya kartları fəaliyyətin lisenziya əsasında həyata keçirildiyini təsdiqləyən rəsmi sənəddir.
5.11. Lisenziya sahibinin avtonəqliyyat vasitələrinin sayı artarsa, həmin avtonəqliyyat vasitələrinin sayına müvafiq əlavə lisenziya kartları bu Qaydalara uyğun verilir.
VI. Lisenziyanın qüvvədə olma qaydaları və nəzarət
6.1. Bu Qaydalara əsasən lisenziya sahibləri fəaliyyət növünü həyata keçirərkən aşağıdakı qaydalara riayət etməlidirlər:
6.1.1. avtomobil nəqliyyatı ilə daşıma qaydalarına, hərəkət vasitəsinin texniki istismar qaydalarına, avtonəqliyyat vasitəsi ilə sərnişin və yük daşımalarında yol hərəkətinin təhlükəsizliyini təmin edən tələblərə;
6.1.2. yol nəqliyyat hadisələrinin aradan qaldırılması və ekoloji normaların yerinə yetirilməsi tələblərinə;
6.1.3. lisenziyada göstərilən avtonəqliyyat vasitələrinin tərkibi, sayı, marşrutu və s. barədə şərtlərə.
6.2. Lisenziyanın qüvvədə olma qaydalarına nəzarəti «Azəravtonəqliyyat» Dövlət Konserni həyata keçirir.
6.3. Nəzarət qaydasında «Azəravtonəqliyyat» Dövlət Konserninin səlahiyyətlərinə aşağıdakılar daxildir:
6.3.1. lisenziyada göstərilən fəaliyyət növünün həyata keçirilməsini tənzimləyən normativ-hüquqi aktlara və lisenziya qaydalarına riayət edilməsini yoxlamaq;
6.3.2. yoxlama zamanı ortaya çıxan suallara aid lisenziya sahibindən məlumatlar, arayışlar istəmək və almaq;
6.3.3. yoxlamanın nəticələrinə dair pozuntuları və onların aradan qaldırılması müddətini göstərməklə akt tərtib etmək;
6.3.4. müəyyən edilmiş pozuntuların aradan qaldırılması barədə lisenziya sahibinə xəbərdarlıq vermək;
6.3.5. lisenziyanın fəaliyyətinin dayandırılması və ya ləğv edilməsi barədə məsələyə baxmaq;
6.3.6. respublikanın ərazisində avtonəqliyyat vasitələrində lisenziya kartlarının olmasına və düzgün istifadəsinə nəzarət.
6.4. Lisenziya sahibi aparılan yoxlama zamanı «Azəravtonəqliyyat» Dövlət Konserninin səlahiyyətli nümayəndələrinə yoxlanılacaq obyektlərə daxil olmağa, yoxlamanın aparılması üçün zəruri olan normal şərait yaratmağa və tələb olunan sənədləri onlara təqdim etməyə borcludur.
6.5. Yoxlamanın nəticəsi barədə iki nüsxədən ibarət akt tərtib edilir. O, «Azəravtonəqliyyat» Dövlət Konserninin səlahiyyətli nümayəndələri və lisenziya sahibi tərəfindən imzalanır. Aktı imzalamaqdan imtina edildikdə bu barədə aktda qeyd edilir. Akta lisenziya sahibinin (müəssisənin rəhbərinin) izahatı əlavə edilir. Aktın bir nüsxəsi lisenziya sahibində qalır.
6.6. «Azəravtonəqliyyat» Dövlət Konserni zəruri olduqda müvafiq təşkilatların nümayəndələrini bu Qaydalara uyğun nəzarət qaydasında aparılan yoxlamalara cəlb edə bilər.
VII. Lisenziyanın fəaliyyətinin dayandırılması və ya ləğv edilməsi
7.1. «Azəravtonəqliyyat» Dövlət Konserni verdiyi lisenziyanın fəaliyyətini aşağıdakı hallarda dayandırır:
7.1.1. ərizəçi tərəfindən müvafiq ərizə təqdim edildikdə;
7.1.2. ərizəçi tərəfindən normativ aktlara əməl edilmədikdə, yaxud Azərbaycan Respublikasının qanunvericiliyinə uyğun olaraq müvafiq dövlət orqanları tərəfindən ərizəçinin fəaliyyəti dayandırıldıqda;
7.1.3. hüquqi şəxsin və ya fiziki şəxsin müflisləşmə faktı Azərbaycan Respublikasının qanunvericiliyi ilə təsdiq edildikdə;
7.1.4. fəaliyyət növünün həyata keçirilməsi üçün bu Qaydalarla tələb olunan zəruri şərait və şərtlər pozulduğu aşkar edildikdə;
7.1.5. Azərbaycan Respublikasının qanunvericiliyində nəzərdə tutulan digər hallarda.
7.2. «Azəravtonəqliyyat» Dövlət Konserni lisenziyanın fəaliyyətinin dayandırılması haqqında qərar qəbul etdiyi andan 5 gün müddətində yazılı şəkildə lisenziyanın sahibinə və dövlət vergi xidməti orqanlarına məlumat verir.
Lisenziyanın fəaliyyətinin dayandırılmasına səbəb olan hallar dəyişildikdə lisenziyanın fəaliyyəti lisenziyanın sahibinin müraciətinə əsasən bərpa edilə bilər. «Azəravtonəqliyyat» Dövlət Konserni tərəfindən bu barədə qərar qəbul edildikdə lisenziya bərpa edilmiş hesab olunur, həmin qərar qəbul edilmiş andan 5 gün müddətində lisenziyanın sahibinə və dövlət vergi xidməti orqanlarına məlumat verilir.
7.3. «Azəravtonəqliyyat» Dövlət Konserni lisenziyanı aşağıdakı hallarda ləğv edir:
7.3.1. ərizəçi tərəfindən müvafiq ərizə təqdim edildikdə;
7.3.2. lisenziya verilməsi üçün təqdim edilən sənədlərdə düzgün olmayan məlumatlar aşkar edildikdə;
7.3.3. lisenziyanın qüvvədə olma qaydaları ərizəçi tərəfindən pozulduqda;
7.3.4. məhkəmənin müvafiq qərarı olduqda;
7.3.5. hüquqi şəxs ləğv edildikdə və sahibkar kimi fəaliyyət göstərən fiziki şəxsə verilən şəhadətnamə qüvvəsini itirdikdə;
7.3.6. Azərbaycan Respublikasının qanunvericiliyində nəzərdə tutulan digər hallarda.
7.4. «Azəravtonəqliyyat» Dövlət Konserni lisenziyanın ləğv edilməsi haqqında qərar qəbul etdiyi andan 5 gün müddətində yazılı şəkildə lisenziyanın sahibinə və dövlət vergi xidməti orqanlarına məlumat verir.
7.5. Lisenziyanın fəaliyyətinin dayandırılması, ləğv edilməsi və ya bərpası haqqında qəbul edilmiş qərar lisenziyanın bu Qaydalara əsasən ayrı-ayrı obyektlər və ya avtonəqliyyat vasitələri üçün verilmiş surətlərinə və ya lisenziya kartlarına da şamil olunur.
7.6. «Azəravtonəqliyyat» Dövlət Konserni verdiyi, qeydə aldığı, dayandırdığı, bərpa etdiyi və ləğv etdiyi lisenziyaların reyestrini aparır.
VIII. Məsuliyyət
8.1. «Azəravtonəqliyyat» Dövlət Konserninin rəhbərləri və vəzifəli şəxsləri lisenziyalaşdırma haqqında Azərbaycan Respublikasının qanunvericiliyinin pozulması, yaxud onun lazımi şəkildə icra olunmasına görə mövcud qanunvericiliyə uyğun məsuliyyət daşıyırlar.
8.2. «Azəravtonəqliyyat» Dövlət Konserninin qərarlarından və onun vəzifəli şəxslərinin hərəkətlərindən müəyyən olunmuş qaydada məhkəmə orqanlarına şikayət oluna bilər.
8.3. Bu Qaydalarda göstərilən fəaliyyət növləri ilə lisenziyasız məşğul olanlar mövcud qanunvericiliyə uyğun məsuliyyət daşıyırlar.
IX. Maliyyələşmə
9.1. Lisenziya verilməsi üçün ödəniş rüsumu bütövlükdə respublika büdcəsinə keçirilir.
9.2. Ərizəçilər ərizələrə baxılması üçün «Azəravtonəqliyyat» Dövlət Konserninə lisenziya verilməsinə müəyyən edilmiş rüsumun 10 faizi məbləğində haqq ödəyirlər.
© LegalActs LLC