9.1. İnsan hüquqlarının və əsas azadlıqların müdafiəsi haqqında Konvensiyaya və ona əlavə Protokollara əsasən (bundan sonra — «Konvensiya») Azərbaycan Respublikasına qarşı qaldırılan işlərə, habelə Azərbaycan Respublikasının qaldırdığı işlərə Məhkəmədə baxılması zamanı Azərbaycan Respublikasının mənafelərinin müdafiəsi;

9.2. Konvensiyadan irəli gələn öhdəliklərə Azərbaycan Respublikası tərəfindən riayət olunmasına dair Məhkəmə və Avropa Şurası Nazirlər Komitəsi qərarlarının icrasının təmin edilməsi məqsədi ilə müvafiq dövlət orqanlarının fəaliyyətinin əlaqələndirilməsi;

9.3. Konvensiyanın tərəfi olan dövlətlər haqqında Məhkəmənin çıxardığı qərarların hüquqi nəticələrinin öyrənilməsi və Məhkəmənin presedent hüququnu nəzərə alaraq qanunvericiliyin və hüququn tətbiqi təcrübəsinin təkmilləşdirilməsi üçün təkliflərin hazırlanması.

10.1. Məhkəmədə Azərbaycan Respublikasına qarşı qaldırılmış işlərdə, habelə digər dövlətlər tərəfindən Konvensiyanın pozulması ilə əlaqədar Azərbaycan Respublikası tərəfindən qaldırılmış işlərdə Azərbaycan Respublikasının nümayəndəsi qismində çıxış edir;

10.2. Məhkəmədə Azərbaycan Respublikasına qarşı və ya Azərbaycan Respublikası tərəfindən qaldırılmış iddialar, habelə bu iddialarla bağlı işlərin gedişi barədə Azərbaycan Respublikasının Prezidentinə məlumat verir;

10.3. Səlahiyyətlərinə aid məsələlərin həllinə dair işçi və ekspert qrupları yaradır, mütəxəssisləri, alimləri və ekspertləri bu qrupa cəlb edir. İşçi qrupların tərkibi və fəaliyyət müddəti Azərbaycan Respublikası Prezidentinin Administrasiyasının rəhbəri tərəfindən müəyyən edilir;

10.4. Məhkəmədə Azərbaycan Respublikasının tərəf olduğu işlərin səmərəli müdafiəsi üçün yerli və xarici vəkilləri və ekspertləri (o cümlədən müqavilə əsasında) cəlb edə bilər;

10.5. Məhkəmə qarşısında Azərbaycan Respublikası ilə bağlı baxılan işlərdə mübahisənin barışıq sazişi yolu ilə nizamlanması məqsədi ilə danışıqlar aparır;

10.6. Konvensiyanın pozulması ilə əlaqədar Azərbaycan Respublikasının qaldıra biləcəyi iddiaların mümkünlüyünü və məqsədəmüvafiqliyini araşdırır, habelə bu barədə dövlət orqanlarının, hüquqi və fiziki şəxslərin təkliflərinə baxır. Azərbaycan Respublikasının qaldıra biləcəyi iddia ilə bağlı məsələni Səlahiyyətli nümayəndə öz təşəbbüsü ilə də qaldıra bilər;

10.7. Azərbaycan Respublikasının qaldıra biləcəyi iddianın məqsədəmüvafiqliyi ilə bağlı Azərbaycan Respublikasının Xarici İşlər, Ədliyyə nazirliklərinin və digər əlaqədar dövlət orqanlarının rəylərini ala bilər;

10.8. Azərbaycan Respublikasına aid işlərə baxılması ilə əlaqədar Məhkəmədən daxil olmuş sorğulara cavab verir, bu işlərlə bağlı Məhkəməyə yazılı qeyd və şərhləri təqdim edir;

10.9. Məhkəmədə baxılan işin faktiki və hüquqi əsaslarının araşdırılması, Məhkəmənin göndərdiyi sorğulara cavab verilməsi, şərhlərin və qeydlərin hazırlanması, işin Məhkəmə qarşısında səmərəli müdafiə edilməsi üçün müvafiq dövlət orqanlarından lazımi məlumat əldə edir. Bu orqanlar tələb olunan məlumatı Səlahiyyətli nümayəndənin göstərdiyi müddətdə təqdim edirlər;

10.10. Məhkəmədə işlərə baxılması ilə əlaqədar müvafiq dövlət orqanlarından tələb olunan sənədlərin hazırlanmasına kömək göstərir;

10.11. İddiaçıya pul kompensasiyasının ödənilməsi və ya pozulmuş hüquq və azadlıqların bərpa olunması haqqında Məhkəmə tərəfindən qərar qəbul edildiyi halda, Məhkəmə qərarının tam və vaxtında icra edilməsi məqsədi ilə aidiyyəti dövlət orqanlarına məlumat verir;

10.12. Məhkəməyə və Avropa Şurasının Nazirlər Komitəsinə Məhkəmə qərarlarının Azərbaycan Respublikası tərəfindən icra edilməsi barədə məlumat verir;

10.13. Məhkəmənin çıxardığı qərarların hüquqi nəticəsini nəzərə alaraq normativ hüquqi aktları Konvensiyanın tələblərinə uyğunlaşdırmaq və onların tətbiqi ilə bağlı Konvensiyanın tələblərinin pozulması hallarının qarşısını almaq üçün təkliflər verir.