Azərbaycan Milli Elmlər Akademiyası sistemində çalışan işçilərə dövlət qayğısını artırmaq, onların sosial müdafiəsinin daha da gücləndirilməsini təmin etmək məqsədi ilə qərara alıram:

1. Azərbaycan Milli Elmlər Akademiyası işçilərinin Vahid Tarif Cədvəli ilə müəyyən edilmiş aylıq vəzifə maaşları orta hesabla 2 dəfə artırılsın.

2. Azərbaycan Milli Elmlər Akademiyasının həqiqi üzvlərinin aylıq rütbə maaşları 1200 manat və müxbir üzvlərinin aylıq rütbə maaşları 850 manat məbləğində müəyyən edilsin.

3. Azərbaycan Milli Elmlər Akademiyasının elmi bölmələrinin akademik katiblərinin və Rəyasət Heyəti üzvlərinin aylıq vəzifə maaşları 1 milyon 200 min manat məbləğində müəyyən edilsin.

4. Azərbaycan Respublikası Nazirlər Kabineti bu Sərəncamdan irəli gələn məsələləri həll etsin.

5. Bu Sərəncam 2002-ci il iyul ayının 1-dən qüvvəyə minir.