Avropa Parlamenti ilə Azərbaycan Respublikasının Milli Məclisi arasında əməkdaşlıq məsələləri haqqında
Azərbaycan Respublikası Milli Məclisinin Qərarı
Avropa Parlamentinin 2015-ci il sentyabrın 10-da Azərbaycana dair qəbul etdiyi ədalətsiz və qeyri-obyektiv qətnamə bu parlament təşkilatı ilə Azərbaycan arasında münasibətlərin inkişafına ciddi zərbə vurmuşdur. Ölkəmizlə Avropa İttifaqı və onun üzvü olan dövlətlər arasında tərəfdaşlığı sarsıtmağa, Azərbaycanın beynəlxalq nüfuzuna xələl gətirməyə yönələn bu qərəzli siyasi aksiyanın cavabında Azərbaycan Respublikasının Milli Məclisi 2015-ci il sentyabrın 14-də qərar qəbul etmişdir. Qərarda Avropa Parlamentində müəyyən qüvvələr tərəfindən Azərbaycan barəsində sistemli və davamlı şəkildə aparılan qarayaxma kampaniyasına qiymət verilmiş, bu qüvvələrin Avropa İttifaqı–Azərbaycan münasibətlərinə qarşı pozuculuq fəaliyyətinə son qoyulması üçün zəruri tədbirlər müəyyənləşdirilmişdir. Milli Məclis Avronest Parlament Assambleyasında üzvlüyə xitam verilməsi barədə prosedur qaydalarının icrasına başlanılmasını və prosedur dövründə Milli Məclisin nümayəndə heyətinin Avronest Parlament Assambleyasının tədbirlərinə qatılmamasını qərara almışdır. Eyni zamanda, həmin qərarla Avropa İttifaqı–Azərbaycan Parlament Əməkdaşlığı Komitəsinin mövcud formatda fəaliyyətində Milli Məclisin iştirakına son qoyulmuşdur.
Milli Məclis Avropa Parlamentindən tələb etmişdir ki, Azərbaycana münasibətdə obyektiv mövqe tutsun və bu yanaşmanı real addımlarla nümayiş etdirsin. Bununla birlikdə, Avropa Parlamentindəki konstruktiv və sağlam qüvvələrə müraciət edilmişdir ki, Avropa Parlamentinin nüfuzuna xələl gətirən bu cür fəaliyyətin qarşısını almaq üçün səylərini artırsınlar.
2016-cı ilin aprel ayında Avropa Parlamentinin rəhbərliyi Avropa Parlamenti ilə Milli Məclis arasında dialoqu bərpa etmək üçün Avronest Parlament Assambleyasının nümayəndə heyətini Azərbaycana ezam etmişdir. Bu istiqamətdə danışıqların davam etdirilməsi üçün sentyabr ayının 19–21-də Avropa Parlamentinin deputatlarından ibarət səlahiyyətli nümayəndə heyəti Azərbaycana səfər etmiş və dövlətimizin bir sıra rəsmi şəxsləri ilə görüşlər keçirmişdir.
Nümayəndə heyətini Azərbaycan Respublikasının Prezidenti cənab İlham Əliyev qəbul etmişdir. Dövlət başçısı Avropa Parlamentinin göstərilən qətnaməsi ilə bağlı tənqidi qeydlərini açıq və qəti surətdə ifadə etmiş, Avropa Parlamenti ilə əlaqələrin bərpa edilməsi və bu əlaqələrin qarşılıqlı hörmət, bərabərlik və anlaşma əsasında inkişaf etdirilməsi barədə mülahizələrini söyləmişdir.
Səfərin yekunlarına əsasən qəbul olunmuş bəyanatda Avropa Parlamentinin nümayəndə heyəti bir ildən bəri Avropa Parlamenti ilə Milli Məclis arasında dialoqun olmamasından təəssüfləndiyini bildirmiş, qarşılıqlı münasibətlərin qırılmasına gətirib çıxara biləcək hər hansı halların gələcəkdə baş verməməsi üçün zəruri tədbirlər görüləcəyinə əmin etmişdir. Nümayəndə heyəti bunu da birmənalı olaraq bəyan etmişdir ki, Avropa Parlamenti Azərbaycanın ərazi bütövlüyünü və suverenliyini tamamilə dəstəkləyir.
Azərbaycan Respublikasının Milli Məclisi hesab edir ki, Avropa Parlamenti ilə Milli Məclis arasında dialoqun və əməkdaşlığın bərpa edilməsi istiqamətində Avropa Parlamenti tərəfindən atılan addımlar Avronest Parlament Assambleyasında Milli Məclisin üzvlüyünün və Avropa İttifaqı–Azərbaycan Parlament Əməkdaşlığı Komitəsinin fəaliyyətinin bərpasına zəmin yaradır.
Yuxarıda şərh edilənləri nəzərə alaraq, Azərbaycan Respublikasının Milli Məclisi qərara alır:
Azərbaycan Respublikası Milli Məclisinin 2015-ci il 14 sentyabr tarixli qərarının 10-cu və 11-ci bəndləri qüvvədən düşmüş sayılsın.
Azərbaycan Respublikası
Milli Məclisinin Sədri O.Əsədov
Bakı şəhəri, 30 sentyabr 2016-cı il.
3 Oktyabr 2016, 09:10
15 Noyabr 2016, 10:11
“Meliorasiya və irriqasiya haqqında” Azərbaycan Respublikasının Qanununda dəyişiklik edilməsi barədə ətraflı...
15 Noyabr 2016, 10:11
“Mədəniyyət haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2016-cı il 30 sentyabr tarixli 313-VQD nömrəli Qanununun tətbiqi və “Mədəniyyət haqqında” Azərbaycan Respublikasının 2012-ci il 21 dekabr tarixli 506-IVQ nömrəli Qanununun tətbiqi barədə” Azərbaycan Respublikası Prezidentinin 2013-cü il 15 fevral tarixli 828 nömrəli Fərmanında dəyişikliklər edilməsi haqqında ətraflı...
15 Noyabr 2016, 10:11
“Mədəniyyət haqqında” Azərbaycan Respublikasının Qanununda dəyişiklik edilməsi barədə ətraflı...
15 Noyabr 2016, 10:11
“Azərbaycan Respublikasının Hökuməti və Türkiyə Respublikasının Hökuməti arasında Trans-Anadolu təbii qaz sisteminə dair” Anlaşma Memorandumunun təsdiq edilməsi haqqında ətraflı...
15 Noyabr 2016, 10:11
“Azərbaycan Respublikası Hökuməti ilə Fələstin Dövləti Hökuməti arasında diplomatik pasportu olan müvafiq vətəndaşların viza tələbindən azad edilməsi haqqında” Sazişin təsdiq edilməsi barədə ətraflı...
15 Noyabr 2016, 10:11
“Azərbaycan Respublikası Hökuməti ilə İsveç Krallığı Hökuməti arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” Konvensiyanın və onun Protokolunun təsdiq edilməsi barədə ətraflı...
15 Noyabr 2016, 10:11
“Azərbaycan Respublikası Hökuməti ilə Malta Respublikası Hökuməti arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” Konvensiyanın və onun Protokolunun təsdiq edilməsi barədə ətraflı...
15 Noyabr 2016, 10:11
Azərbaycan Respublikası ilə QİÇS, vərəm və malyariya ilə mübarizə üzrə Qlobal Fond arasında Çərçivə Sazişinin təsdiq edilməsi haqqında ətraflı...
15 Noyabr 2016, 10:11
Müstəqil Dövlətlər Birliyində malların mənşə ölkəsinin təyin edilməsi Qaydaları haqqında 2009-cu il 20 noyabr tarixli Sazişdə dəyişikliklər edilməsi barədə Protokolun təsdiq edilməsi haqqında ətraflı...
15 Noyabr 2016, 10:11
“Azərbaycan Respublikasının Vergi Məcəlləsində dəyişiklik edilməsi haqqında” Azərbaycan Respublikasının 2016-cı il 30 sentyabr tarixli 314-VQD nömrəli Qanununun tətbiqi və Azərbaycan Respublikası Prezidentinin 2008-ci il 22 aprel tarixli 744 nömrəli Fərmanı ilə təsdiq edilmiş “Giriş-çıxış və qeydiyyat” idarələrarası avtomatlaşdırılmış məlumat-axtarış sistemi haqqında Əsasnamə”də dəyişikliklər edilməsi barədə ətraflı...