“15 yaşı tamam olmamış Azərbaycan Respublikası vətəndaşının fərdi identifikasiya kartı haqqında” Azərbaycan Respublikasının Qanununda dəyişikliklər edilməsi barədə

Azərbaycan Respublikasının Qanunu

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 1-ci və 10-cu bəndlərini rəhbər tutaraq qərara alır:

“15 yaşı tamam olmamış Azərbaycan Respublikası vətəndaşının fərdi identifikasiya kartı haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2014, № 2, maddə 83) aşağıdakı dəyişikliklər edilsin:

1. 2.1-ci maddə üzrə:

1.1. “doğulduğu tarix,” sözlərindən sonra “doğulduğu yer,” sözləri əlavə edilsin;

1.2. aşağıdakı məzmunda ikinci cümlə əlavə edilsin:

“5 yaşı tamam olmuş vətəndaşa verilən fərdi identifikasiya kartında bu məlumatlardan əlavə, vətəndaşın fotoşəkli də yerləşdirilir.”.

2. 2.2.3-cü, 2.2.5-ci və 2.3-cü maddələr ləğv edilsin.

3. 3.1-ci maddə üzrə:

3.1. ikinci cümlədə “15” rəqəmləri “5” rəqəmi ilə əvəz edilsin;

3.2. aşağıdakı məzmunda üçüncü cümlə əlavə edilsin:

“5 yaşı tamam olmuş vətəndaşa verilən fərdi identifikasiya kartı vətəndaşın 15 yaşı tamam olanadək etibarlıdır.”.

4. 3.2-ci maddənin ikinci cümləsində “vətəndaşın qan qrupunun və gözlərinin rənginin göstərildiyi tibbi arayış, doğum haqqında şəhadətnamə (bu Qanun qüvvəyə minənədək doğum haqqında şəhadətnamə verilmişdirsə), qanuni nümayəndənin şəxsiyyət vəsiqəsi və qanuni nümayəndə olduğunu təsdiq edən sənəd” sözləri “15 yaşı tamam olmamış Azərbaycan Respublikası vətəndaşının fərdi identifikasiya kartı haqqında” Azərbaycan Respublikası Qanununun tətbiqi barədə Əsasnamə”də nəzərdə tutulan sənədlər” sözləri ilə əvəz edilsin.

5. Aşağıdakı məzmunda 3.3-1-ci maddə əlavə edilsin:

“3.3-1. 5 yaşı tamam olmuş vətəndaşa fərdi identifikasiya kartının verilməsinə və ya dəyişdirilməsinə görə, habelə fərdi identifikasiya kartının sənədlər müvafiq icra hakimiyyəti orqanına daxil olduğu gündən 3 və ya 1 iş günü müddətində verilməsinə və ya dəyişdirilməsinə görə “Dövlət rüsumu haqqında” Azərbaycan Respublikasının Qanunu ilə müəyyən edilmiş məbləğdə dövlət rüsumu alınır.”.

6. 3.4-cü maddədə “Bu Qanunun” sözləri “Vətəndaşın 5 yaşı tamam olduqda, yaxud bu Qanunun” sözləri ilə əvəz edilsin.

7. 3.6-cı maddə üzrə:

7.1. birinci cümlədə “3.3-cü maddəsində” sözləri “3.3-cü, 3.3-1-ci və ya 3.6-1-ci maddələrində” sözləri ilə əvəz edilsin;

7.2. ikinci cümlədə “daxil etmiş orqana” sözləri “dəyişdirmək səlahiyyətinə malik orqana və ya tibb müəssisəsinə” sözləri ilə əvəz edilsin.

8. Aşağıdakı məzmunda 3.6-1-ci maddə əlavə edilsin:

“3.6-1. Fərdi identifikasiya kartının üzərində göstərilən məlumatlarda səhv müəyyənləşdirildikdə, həmin kart müvafiq icra hakimiyyəti orqanına daxil olduğu gündən 1 gün müddətində dövlət rüsumu alınmadan dəyişdirilir.”.

9. 3.7-ci maddə aşağıdakı redaksiyada verilsin:

“3.7. Fərdi identifikasiya kartının elektron daşıyıcısına (çipinə) daxil edilmiş məlumatların dəyişdirilməsinə, habelə 5 yaşı tamam olmamış vətəndaşa bu Qanunun 3.3-cü maddəsində göstərilən müddətdə fərdi identifikasiya kartının verilməsinə və dəyişdirilməsinə görə dövlət rüsumu ödənilmir.”.

10. 3-cü maddənin “Qeyd” hissəsində “2015-ci il dekabrın 1-dək 15” sözləri “Bu Qanun qüvvəyə minənədək 16” sözləri ilə əvəz edilsin.

 

İlham Əliyev

Azərbaycan Respublikasının Prezidenti

 

Bakı şəhəri, 28 oktyabr 2014-cü il.

2 Dekabr 2014, 09:12

© 2013, «LegalActs» LLC, All rights reserved
The Website Use Agreement