1. 2002-ci il iyunun 5-də Bakı şəhərində imzalanmış «Azərbaycan Respublikası və Avstriya Respublikası arasında iqtisadiyyat, kənd təsərrüfatı, sənaye, texnika və texnologiya sahələrində əməkdaşlıq üzrə Qarışıq Komissiyanın ikinci iclasının Protokolu» nəzərə alınsın.

2. Azərbaycan Respublikasının Nazirlər Kabinetinə tapşırılsın ki, bu Sərəncamın 1-ci bəndində göstərilən Protokoldan irəli gələn məsələlərin həyata keçirilməsi ilə əlaqədar lazımi tədbirlər görsün.

1998-ci il 13 noyabr tarixində Azərbaycan Respublikası Hökuməti və Avstriya Respublikası Federal Hökuməti arasında iqtisadiyyat, kənd təsərrüfatı, sənaye, texnika və texnologiya sahələrində əməkdaşlıq haqqında imzalanmış Sazişin 14-cü maddəsinə uyğun olaraq, Azərbaycan Respublikası Hökuməti və Avstriya Respublikası Federal Hökuməti arasında iqtisadiyyat, kənd təsərrüfatı, sənaye, texnika və texnologiya sahələrində əməkdaşlıq üzrə Komissiyanın ikinci iclası 03-05 iyun 2002-ci il tarixlərində Bakı şəhərində keçirilmişdir.

İclasa Azərbaycan tərəfindən Azərbaycan Respublikasının İqtisadi İnkişaf Naziri, Komissiyanın həmsədri cənab Fərhad Əliyev, Avstriya tərəfindən Avstriya Federal İqtisadiyyat və Əmək Nazirliyinin Xarici İqtisadi Əlaqələr üzrə Baş Direktoru, Komissiyanın həmsədri cənab Yohan Zaks sədrlik edirdilər.

Hər iki Tərəfin nümayəndə heyətlərinin siyahısı hazırki Protokola əlavə olunur (əlavə № 1 və № 2)

Hər iki Tərəf iqtisadi əlaqələrin ümumi müsbət inkişafını qeyd etdilər və iki ölkənin iqtisadi və ticarət potensialını nəzərə alaraq əlaqələrin bundan sonra daha da möhkəmləndirilməsi arzusunda olduqlarını bildirdilər.

İclasın gündəliyində aşağıdakı məsələlərə toxunuldu:

Hər iki Tərəf ölkələrinin iqtisadi inkişafının vəziyyəti habelə ölkələrində aparılan iqtisadi islahatlar barədə bir-birini məlumatlandırdılar.

Azərbaycan tərəfi qeyd etdi ki, ölkənin iqtisadiyyatında Ümumi Daxili Məhsul, əsas kapitala qoyulan investisiyalar, xarici ticarət dövriyyəsi əhəmiyyətli dərəcədə artmışdır.

Avstriya tərəfi öz iqtisadiyyatının dinamik inkişafını qeyd edərək bu inkişafın xüsusilə investisiyalar, xarici ticarət və turizm sahələrində müşahidə olunduğunu vurğuladı, eləcə də Avstriya Federal Hökumətinin strateji məqsədləri və dövlət büdcəsində kəsirin sıfra endirilməsi istiqamətində həyata keçirdiyi tədbirlər haqqında məlumat verdi.

Müzakirələr nəticəsində Tərəflər qərara gəldilər ki, Azərbaycanın və Avstriyanın müvafiq dövlət orqanları hər iki ölkənin iqtisadiyyatının müxtəlif sahələrinin mövcud durumu və inkişafı barədə müntəzəm olaraq bir-birini məlumatlandıracaqlar.

Hər iki Tərəf əmtəə dövriyyəsinin inkişafı barədə fikir mübadiləsi apardı.

Azərbaycan tərəfi qeyd etdi ki, 2000-ci illə müqayisədə Avstriya ilə xarici ticarət dövriyyəsi 2001-ci ildə 2.2 dəfə artmışdır.

Avstriya tərəfi statistik məlumatlarına əsaslanaraq qeyd etdi ki, ikitərəfli ticarətin həcmi son 10 ildə 10 dəfədən çox artmış və 2001-ci ildə 77,1 mln. avroya çatmışdır.

Hər iki Tərəf ölkələr arasında əmtəə dövriyyəsinin nomenklaturasının genişləndirilməsinin böyük əhəmiyyət kəsb etdiyini və bunun üçün böyük imkanların mövcud olduğunu qeyd etdilər.

Belə ki, neft, kənd təsərrüfatı, kimya məhsullarının Azərbaycandan ixracının artırılması məqsədəuyğun hesab edildi. Avstriyadan Azərbaycana infrastrukturun inkişafında istifadə olunan avadanlıqların, yeni texnologiyaların, neft, kənd təsərrüfatı avadanlığının, xalq istehlakı mallarının idxalının artırılması tövsiyyə edildi.

Tərəflər investisiya əməkdaşlığının genişləndirilməsinin hər iki ölkə üçün əhəmiyyətini qeyd edərək bu əməkdaşlığın mövcud vəziyyətinin ölkələrin potensialına uyğun olmadığını və investisiya əməkdaşlığının genişləndirilməsi üçün böyük imkanların mövcud olduğunu bildirdilər.

Hər iki tərəf daha sıx və intensiv əməkdaşlıqda, eləcə də Avstriya Respublikası və Azərbaycan Respublikasının iştirakı ilə xüsusilə aşağıdakı sahələrdə birgə layihələrin həyata keçirilməsində maraqlıdırlar:

Komissiya bundan sonra da Avstriya və Azərbaycan şirkətləri arasında işgüzar əlaqələrin yaradılması və genişləndirilməsində dəstək verəcək və bu məqsədlə imkan daxilində onların Komissiyanın işində iştirak etməsinə şərait yaradacaqdır.

Tərəflər həmçinin iki ölkə arasında iqtisadi əlaqələrin, o cümlədən qeyri-neft sektorunda genişləndirilməsi imkanlarının öyrənilməsi məqsədilə hər iki ölkənin özəl sektorunun nümayəndələrinin iştirakı ilə müxtəlif konfransların, təqdimatların, seminarların və digər tədbirlərin keçirilməsinin vacibliyini vurğuladılar.

Azərbaycan tərəfi öz ərazisində yaşayan qaçqınlara və məcburi köçkünlərə humanitar yardım göstərilməsi barədə Avstriya tərəfinə müraciət etdi.

Avstriya tərəfi müvafiq dövlət qurumlarını bu barədə məlumatlandıracağını bildirdi.

Azərbaycan tərəfi ikitərəfli əməkdaşlıq çərçivəsində Azərbaycan dövlət qulluqçuları və menecerlərinin hazırlanması sahəsində Avstriya tərəfinin apardığı səmərəli işi yüksək qiymətləndirdi. Avstriya tərəfi cari ilin payızında 8 dövlət qulluqçusu üçün seminarın keçiriləcəyini qeyd etdi.

Avstriya tərəfi mövcud vəsait və imkanlar çərçivəsində turizm, kiçik və orta müəssisələr sahəsində tədris imkanlarının təmin edilməsinə hazır olduğunu bildirdi.

Azərbaycan tərəfi, Azərbaycan Respublikasının dövlət iqtisadi orqanlarının mütəxəssislərinin təcrübəsinin artırılması üçün Bakı şəhərində müvafiq tədris mərkəzinin yaradılması məsələsinə baxılmasını Avstriya tərəfindən xahiş etdi.

Komissiyanın iclası çox işgüzar və dostluq şəraitində keçdi və Avstriya tərəfi Azərbaycan tərəfinə göstərilən qonaqpərvərliyə görə minnətdarlığını bildirdi.

Bu Protokol Bakı şəhərində, 2002-ci il iyun ayının 5-də iki əsl nüsxədə, hər biri alman və Azərbaycan dillərində imzalanmışdır. Hər iki mətn eyni qüvvəyə malikdir.